Revue RACINES
« sa ki la pouw dlo pa-a chayé’y »
lè sé adan menm’ ravin la
swê aw ka dégouté a kontinié
Pou sa… la penn pa vo !
A pa tou di bougoné en ba fèy
« Kokin pa-a pwospéré »
lè tout volè a lèz kon Blaise
lè zafè a yo ka fè lô
é lè sé ou ki o bô falez
sé vwé… la penn pa vo !
A pa tou di wonchoné an bab aw
« Pli ta, pli tris »
si an menn dé tan ou pa vlé vwé
pou ki lès
la vi la ka pli an toch jou an jou
Kwê mwen… la penn pa vo !
A pa tou di chigné dèyè pot
« ka ou vlé fê »
si vou menm’ pa sav
si vou menm’ pa ka di sa ou anvi fê
La penn’ pa vo !
A pa tou di espéré :
« Bon Dié bon !… dèmen ké on dot jou »
si apwé jodi la sé ké jimo a jodi la
pli lèd, pli rèd osi.
Non, non ! La penn’ pa vo !
Ka ki paséw’ ?
Ou sé padava ou tin on lo kê,
Ou sé ni ou pa ni kê menm’
Pou ou pé sipôté sa !
Mè lavalas ja baw’ twop tôbok an lè têt,
Zékobel a soley ja rantré an kê aw’ trop’
Pou yo pé di
Ou pa ni fiel è kouraj !
A pa sa !
Sé pas’ sé sèvi yo toujou sèvi èvèw’
Sé trop’ lestomak yo fè an lèw’
Ki fê ou on jan bat’ dèyè
Ou pèd’ la fwa adan lé zot
Adan ou menm’
Mè ki mafouti ésa ?
Pou pôk ou poko pôk !
E pon dôt moun ki ou menm
Pé ké pé woté pié aw
Adan pè pépa la yo pri la.
Kwè mwen… la penn vvo
Sonny RUPAIRE
haut de page